25 ივნისს , 16:00 საათზე, რედისონ ბლუ ივერიაში ჩატარდა „გახდი ოლიმპიელი 2017“-ის დაჯილდოების ცერმონია.
ოლიმპიადას ესწრებოდნენ საქართველოს პირველი ვიცე-პრემიერი, ფინანსთა მინისტრი დიმიტრი ქუმსიშვილი და საქართველოს პარლამენტის წევრი ილია წულაია.
ოლიმპიადაში მონაწილეობა მიიღო დედაქალაქის და სხვა რეგიონების სკოლების მე-6-ე კლასის 1000-მდე მოსწავლემ. “გახდი ოლიმპიელი 2017”-ის ფინალურ ტურში გადავიდა 73 მონაწილე. მათგან 3-ს გადაეცა პრიზები პირველი, მეორე და მესამე ადგილისათვის. ოლიმპიადის ფინალური ტურის დანარჩენ მონაწილეებს კი გადაეცათ საპატიო სიგელები (8 მონაწილე) და ფინალურ ეტაპზე მონაწილეობის სერტიფიკატები (73 მონაწილე). აგრეთვე დაჯილდოვდნენ სპონსორების რჩეული მონაწილეები სხვადასხვა პრიზებით.
აღნიშნული ოლიმპიადა მისი მონაწილეებისთვის იყო უფასო. ყველა ხარჯი დაფინანსდა სპონსორების, ვი თი ჯგუფ-ის, ვისოლი-ს, ლიბერთი ბანკი-ს, ვენდი-ს, ჯი სი ჯი-ს, , ქართულ-ამერიკული სკოლ-ის, ქართულ-ამერიკული უმაღლესი სკოლი-ს და თბილისის არქიმედეს სკოლი-ს მიერ. ასევე ლევან გოგიას და ოლიმპიელების აჩიკო გაჩეჩილაძისა და ირაკლი გოგიას მხარდაჭერით.
ოლიმპიადა უკვე მეორე წელია რაც ტარდება. “გახდი ოლიმპიელი 2016”-ის გამარჯვებულები წინა წლიდან მოყოლებული ესწრებიან ოლიმპიელების მიერ ჩატარებულ გაკვეთილებს და ამასთან მონაწილეობას იღებენ კავშირის მიერ ორგანიზებულ სხვადასხვა ღონისძიებებში.
მოსწავლეთა ოლიმპიადის ორგანიზატორი საქართველოს ოლიმპიელ მათემატიკოსთა კავშირი არის , არაკომერციული ორგანიზაცია, რომელიც 2016 წლის 11 აპრილს დაარსდა. ორგანიზაციის დამფუძნებლები არიან მათემატიკის საერთაშორისო ოლიმპიადაზე საქართველოს სახელით მონაწილე ოლიმპიელები, მათ შორის ოქროს , ვერცხლისა და ბრინჯაოს მედალოსნები. საქართველო მათემატიკის მსოფლიო ოლიმპიადებში 1992 წლიდან მონაწილეობს. დღემდე მოპოვებულია ორი ოქროს მედალი. აქედან ერთი ოქროს მედალი მოიპოვა კავშირის წევრი ოლიმპიელების მოსწავლემ, რომელიც დღეს ასევე წარმოადნგეს საქართველოს ოლიმპიელ მათემატიკოსთა კავშირს.
კავშირის მიზანია აღმოაჩინოს მათემატიკური ნიჭით დაჯილდოებული ბავშვები და ოლიმპიელ მათემატიკოსთა რესურსის გამოყენებით ხელი შეუწყოს მათ განვითარებას.
